கல்லற துறந்நு

அருந்ததி ராயின் கேரளப் பின்னணியில் அமைந்த 'The God of Small Things' நாவலில் வயசான ஓர் அம்மணி வருவார். ஊரில் யார் வீட்டில் இழவு விழுந்தாலும், ஏதாவது உறவு சொல்லிக் கொண்டு முதலில் ஆஜராகி விடுவார் . இறந்தவரின் உடலுக்கு மிக அருகே நிற்பது, பிணத்தின் முகத்தில் தைலம் தடவுவது (இதை இவரே கொண்டு வந்திருப்பார்) என்று ரசித்துச் செயல்படுவார்.

சவங்களை மிக நேசிக்கும் நெக்ரோபிலியா இந்த அம்மாவுக்கு மட்டுமில்லை, கொஞ்சம் அதிகப்படியாகவே சராசரி மலையாள மனதில் இருக்கிறதா என்று எனக்கு வெகு நாளாகவே சந்தேகம் உண்டு.

மலையாளப் தினப் பத்திரிகையில் சிறப்பம்சம் என்ன என்று கேட்டால் சட்டென்று நினைவு வருவது ஒரு பக்கம் முழுக்க வெளியாகும் 'காலமானார்' விளம்பரங்கள் தான். படிக்க வசதியாக மாவட்ட வாரியாகக் கொடுத்திருக்கும் இந்தப் பக்கம் ஒரு நாள் கூட முழுக்க நிரம்பாமல் வெளியாகாது.

இது போதாதென்று 'துங்கி மரிச்சு' (தூக்குப் போட்டுத் தற்கொலை), புழயில் வீணு மரிச்சு, வேன் இடிச்சு மரிச்சு, குத்தேற்று மரிச்சு, விஷம் குடிச்சு மறிச்சு, தீ கொளுத்தி மரிச்சு, ஓட்டோவும் காரும் கூட்டியிடிச்சு மரிச்சு, பஸ்ஸில் நின்னு தெறிச்சு வீணு மரிச்சு, ஷோக்கேற்று மரிச்சு என்று அடுத்த பக்கத்தில் இரண்டு காலம் முழுக்க முழுக்கச் சாவுச் செய்திகள்.

போதாக்குறைக்கு பிரமுகர்களின் சாவுச் செய்தி. நகைச்சுவை நடிகர் ஜகதி ஸ்ரீகுமாரின் மாமியார் இறந்தது இந்த மாதிரி அண்மையில் வந்த பத்து வரி நியூஸ் ஐட்டம்.

இன்றைக்குப் பத்திரிகையைத் திறந்தால் இது -

திருவல்லா பக்கம் கவியூரில் வி.கே.குர்யன் என்பவர் ஆறு மாதம் முன்னால் இறந்து போனார். சவ அடக்கம் கவியூர் ஓர்த்தடோக்ஸ் சர்ச் சார்ந்த செமித்தேரியில் நல்லபடியாக நடந்தது.

அண்மையில் புஷ்பகிரி மருத்துவக் கல்லூரி நடத்திய ஒரு கண்காட்சியில் காட்சிக்கு வைக்கப்பட்ட பொருள்களில் ஒரு பிணமும் உண்டு. பார்க்க வந்த யாரோ, அந்தப் பிணம் குரியனுடையது என்று சொல்ல, பரபரப்பான பத்திரிகைச் செய்தி ஆனதோடு, காவல்துறை விசாரணை ஜரூராகத் தொடங்கியது.

மெடிக்கல் காலேஜில் காட்சிப் பொருளானது குரியனின் உடல் என்றால், கல்லறைக்குள் இருப்பது யார்?

நேற்றைக்குக் காவல்துறை ஏற்பாட்டின் பேரில் ஓர்த்தடோக்ஸ் பள்ளி வளாகசெமித்தேரியில் குரியனின் கல்லறை மறுபடி திறக்கப்பட்டு, உள்ளே இருந்த உடல் வெளியே எடுக்கப்பட்டது. கிட்டத்தட்ட எலும்புக் கூடுதான் அது. இனி டாக்டர்கள் பரிசோதித்து அது குரியன் தானா இல்லை வேறு யாராவதா என்று தெரிவிப்பார்கள்.

பத்திரிகைச் செய்தியில் என் கவனத்தை ஈர்த்த வரி இதுதான் - கல்லற துறக்குன்னது காணான் ஆயிரங்களாணு செமித்தேரிக்குச் சுற்றும் தடிச்சுக் கூடியது (கல்லறை திறக்கப்படுவதைப் பார்க்க ஆயிரக் கணக்கில் மக்கள் செமித்தேரியைச் சுற்றிக் கூடினார்கள்).

பின்குறிப்பு

வேம்ப நாட்டுக் காயல் என்று தலைப்பு வைத்ததே முக்கியமாகக் கேரள கலை, இலக்கிய, அரசியல் நிகழ்வுகளைப் பதிய உத்தேசித்துத்தான். குரியன் ஆரம்பித்து வைத்திருக்கிறார்.